اثار دمج المدارس ENSA,EST,FST فكلية Polytechniqueعلى النظام الدراسي للطلبة الجدد و القدامي:
كولشي كيهدر على الموضوع ديال دمج 3 المدارس ENSA EST FST فكلية Polytechnique وبزاف د الناس كيسولوني عليه ... دونك غنجاوبكم
قبل منبدا غنجاوب الناس لي كيقوليا أنا دبا تقبلت ف إنصا واش وليت بحالي بحال لي تقبل ف EST ولا FST ( مع احترامي لجميع المدارس بدون استثناء ولكن هذا سوال كيتطرح ) الجواب أنك نتا غادي تقرا 5 سنين وتتخرج مهندس بينما اللي تقبلو فالمدرستين الأخريتين راه غيقراو على حسب ما هو مقرر فيهما ( واخا كلكم غتوليو كتقراو فمدرسة وحدة ولكن التكوينات مختلفة و هادي نقطة مهمة جدا شحال من واحد غالط فيها )
دابا نبداو ...
أشناهوا هاد الدمج ؟
مع الأسف السيد الوزير خرج قرار يقضي بدمج المدارس الثلات في واحدة بلا ميخرج قانون أو مرسوم أو أي لعيبة كتنظم الدراسة بهاد البوليتيكنيك ولا الولوج ديالها ولا الأسلاك ... الخ
يعني لحد الآن جميع التكوينات و الدبلومات والأسلاك لي كانت فهاد المدارس غادي تبقا كيما كانت ( طرق الانتقاء ، المباريات ، الولوج ، الدراسة ... الخ غيبقاو كيفما هوما ) التغيير لي غادي يوقع أنك بلاصة متاخد دبلوم مهندس من ENSA غتاخدو من بوليتيكنيك ، وبلاصة متاخد DUT من EST غتاخدو من بوليتيكنيك وهكذا دواليك
المشكل لي واقع الآن هو كفما قلت مكينش قانون أو مذكرة كتنظم هاد البوليتكنيك يعني هاد الأسئلة
فين غنقراو ؟ كيفاش غنقراو ؟ كيفاش غندخلو للبوليتيكنيك العام الجاي ؟ النوادي ديول المؤسسات فين غيمشيو ؟ الشراكات لي كانو مع بعض المؤسسات أش غنديرو فيهم ؟ .... وبزاف د الأسئلة معندهمش جواب ، وكنتسنى بفارغ الصبر السيد الوزير باش يجاوبنا على هادشي باش يبين لينا بلي بصح راه عارف أش كيدير.
دابا أشنو غنستفدو حنا كطلبة من هاد البوليتكيك ؟
الجواب : والو. وكنقول لصحاب FSTو EST و حتى بعض صحاب ENSA لي فرحانين بالدمج : فكرو بعقلكم و غتلقاو بلي راكم ممستفدين والو.
أشنو غتستفد الحكومة من الدمج ؟
الجواب : غتربح بزاف د الفلوس علاش ؟ بلاصة ما تخلص 3 الإدارات غتخلص وحدة و بلاصة متخرج 3 الميزانيات غتخرج وحدة ...الخ
أشنو غادي نخسرو كاملين من هاد الدمج ؟
محو أسماء 3 مدارس لي ما يقارب 20 عام وهوما كاينين وخداو بلاصتهم و سمعتهم فالتخصصات والدبلومات ديالهم وولادة كلية جديدة مكيعرفها تواحد لا في المغرب لا خارجه.
من جهة أخرى غيتزاد العدد ديال الطلبة بشكل مهول فالبوليتيكنيك مما يجعل الدراسة شبيهة بتلك بالكليات متعددة التخصصات وبالتالي نقص في جودة التكوين بجميع التكوينات بدون استثناء.
لحد الآن أنا شرحت ليكوم شنو واقع لحد الآن و في انتظار أي جديد من عند سي الداودي غادي نشاركو معاكم بإذن الله.
منقول عن Syoumi El Mahdi
شارك الموضوع مع اصحابك